Maiatzaren 31ra arte matrikula murriztua Elkano eta lehenengo zirkumnabigazioari buruzko udako ikastaroan

2 MAI, 2019
Getariako itsasgizonak burututako lehen zirkumnabigazioko gertakarien ikuspegi eguneratua proposatzen du Elkano 500 Fundazioak sustatutako ikastaroak.

Maiatzaren 31 bitartean “Elkano eta munduaren inguruko lehen bira: 500 urte geroago” ikastarora joan nahi dutenek matrikula murriztua izango dute izena ematean. Aipatu egunera arte izen-emate orokorren tarifa 60 € izango da, eta gizarte kolektiboek berriz, 35 € ordainduko dute. Ekainaren 1etik aurrera matrikularen zenbatekoa 70 € izango da.

Beherapenetik onura atera dezaketen gizarte taldeak hauek dira: ikasleak, langabetuak, erretiratuak, IIP, AZP, ikasleen praktika programetako erakunde laguntzaileetako irakasleak eta ehualumni sareko pertsonak. Zenbait taldek matrikula ordaintzetik salbuetsita egotea eska dezakete. Beherapenak lortzeko informazio zehatza aurki daiteke UPV/EHUren Udako Ikastaroen web orrian; eta gainera, Elkano eta munduaren inguruko lehen birari buruzko  mintegian parte hartu nahi dutenek bertan egin dezakete izen-ematea.

Euskaldunen betekizuna munduaren inguruko lehen biran

Elkano 500 Fundazioak bultzatuta, Getariako itsasgizon Juan Sebastian Elkanoren zirkumnabigazioak eta munduaren inguruko lehen birak bere lekua izango dute UPV/EHUko Udako Ikastaroen XXXVIII. edizioaren programazioan. Mintegia uztailaren 4an eta 5ean egingo da, Donostiako Miramar jauregian.

Gertakari haien 500. urteurrenean, gertatu zena berrikusi eta eguneratzea proposatzen du ikastaroak, eta euskaldunek izan zuten betekizuna azpimarratu nahi du: eskifaia-kideak, espedizioaren antolatzaileak eta ontzi eraikitzaileak. 

UPV/EHUko Udako Ikastaro honen zuzendariak dira Elkano 500 Fundazioko Aholku Batzordeko kide Daniel Zulaika, eta fundazioko zuzendari Ion Irurzun. Programan historialari hauek parte hartuko dute: Pablo Pérez-Mallaína (Sevillako unibertsitatea), Daniel Zulaika (Elkano 500 Fundazioko Aholku Batzordea), Xabier Alberdi (Euskal Itsas Museoa), Alvaro Aragón (UPV /EHU) edo Amaia Rojo (UPV/EHU). Programa osoa ikus daiteke hemen. 

Mintegiak ahozko komunikazioen atal bat ere izango du; une honetan komunikazioetarako hautagaiak aukeratze-prozesuan daude.

 

 

Elkanori buruzko Uda Ikastaroa - programa